كشفت النجمة هند صبرى في تصريحات لـ"اليوم السابع" عن دورها في الجزء الثانى من مسلسلها البحث عن علا  الذى سيطرح على منصة نيتفلكس يوم 26 سبتمبر الجارى، وسيتكون العمل من 6 حلقات ستطرح دفعة واحدة على المنصة.

وصرحت هند صبرى قائلة: "أنا مشرفة على كتابة الموسم الثانى من البحث عن علا، لأن أنا دايمًا بحس أن علا جزء منى، أنا عارفة تفاصيلها كويس، وعارفة بتفكر إزاى وهتتصرف إزاى دايمًا، وهى أقرب شخصية ليا من كل اللى قدمتهم، أنا بقالى سنتين ونص تقريبًا عايشة مع علا".

وتابعت هند صبرى قائلة: "علا مشتتة زى، وغالبًا كلنا مشتتات، وعلشان كده كان في الكتابة عندى شوية محاور مكنتش عايزة منعالجهمش في البحث عن علا سواء الموسم الأول أو الثانى، والحمد لله في الأول ده حصل وإن شاء في الثانى لما تشوفوه ده حصل، والحقيقة أنا كـ هند تعبت من التشتيت، فـ الحمد لله أنى عندى مكان أترجم فيه إحساسى وعلا هي الترجمة بتاعتى كل سنتين أحط مشاكلى في موسم جديد منها".

وأشارت هند صبرى قائلة: "أنا فاكرة كويس كنت مسافرة الساحل سنة 2009، واشتريت قصة قصيرة والغلاف بتاعها أخضر مكتوب عليه "عايزة أتجوز"، أشترتها وعلى ما وصلنا الساحل كنت خلصتها، وطول الطريق وأنا بضحك بصوت عالى، وجوزى وهو سايق بيقولى في إيه وأقوله مش معقولة، لقيت مكتوب اسم المؤلفة غادة عبد العال، ومكنتش عارفة هوصلها إزاى، وكان المنتج طارق الجناينى ساعتها اتفقنا نعمل مسلسل سوا، فكلمته قولتله، وبدأت الرحلة من هنا، والمسلسل ده منجحش في وقتها بسبب طريقة تصويره اللى ناس كتير اتريقت عليه وقالوا عليها شخصية أوفر في وقتها، دلوقتى الناس بتنام عليه".

وأكدت هند صبرى قائلة: "الشغل على البحث عن علا متعب أكيد لأن أنا بلبس كذا كاب في المسلسل هنا، سواء الإشراف على الكتابة أو أنى منتجة منفذة بالإضافة لأنى ممثلة كمان في المسلسل فده صعوبته وحلاوته في نفس الوقت، لأن انا دايمًا ورايا حاجات، من التصوير للمونتاج لـ اختيار الموسيقى مع خالد كمار، وكمان بنختار أغانى لأن الموسم الثانى في أغانى زى الموسم الأول، لازم تبقى ليها بصمتها".