قالت الفنانة درة، إن كل أحداث الفيلم التسجيلي "وين صرنا"، حقيقية 100%، ولا يوجد أي مشهد مُفتعل، موجهة التحية إلى المصور الغزاوي، أحمد الدنف، الذي صور كافة المشاهد من قطاع غزة، والتي تم عرضها في الفيلم لاحقا.

وأضافت خلال لقائها مع الإعلامية منى الشاذلي ببرنامج "معكم" الذي يذاع على قناة "on": "التصوير هناك كان صعب جدا في ظل الظروف اللي كلنا بنشوفها ونتابعها في غزة، والمصور صور كل المشاهد اللي كنت متخيلاها وعاوزاها، خاصة أن في مشاهد لو باظت مش هنعرف نعملها تاني".

وتابعت: "على سبيل المثال، بيت الأسرة دي اللي اتدمر في منطقة تل الهوى في الشمال، مستحيل ينفع حد يروح عشان ياخد لقطات من البيت، واحنا مش هنعرض حياة حد للخطر بالتأكيد".

وقالت: "احنا لو وقفنا عند كل كلمة وكل جملة اتقالت في الفيلم، هنلاقي فعلا ان الأمر واللي بيحصل هناك ده أمر لا يستوعبه عقل، وان دي بقت الحياة، الناس دلوقتي بتتكلم في الطريقة الأفضل للموت".

وأضافت: "اللي اتعملته من التجربة دي، في المقام الأول إنساني، درس إنساني بكل ما تحمله الكلمة من معنى، كمان اتعلمت تكنيك الأفلام التسجيلية، وأنا محاولتش أعمله ضخم، أنا عملته في منتهى البساطة".