ازاي مصر اقتحمت سوق صناعة الأجهزة المنزلية بكل انواعها وبقت الاكبر في المنطقة ومركز صناعي عالمي واعد في الصناعة دي وازاي مصر هتوفر مليارات الدولارات سنوياً من تصدير المنتجات دي.

توطين الصناعة هو هدف وأولوية الحكومة الحالية وبتكليفات مباشرة من رئيس الجمهورية ودا لتصحيح الخلل في الاقتصاد المصري والميزان التجاري وإعادة الحياة للصناعات المصرية واللي واقعها مكانش يتناسب مع تاريخها الطويل.. وعلى مدار 10 سنين بدأت مصر أكبر نهضة صناعية حقيقية واقتحمت صناعات متقدمة ومعقدة لاول مرة وشفنا دلوقتي مصر بدأت بطتصنع كل شيء بداية من فلنكات السكك الحديدية لغاية الأقمار الصناعية ولسه القطاع الصناعي فيه فرص هتحول لمصر لقوة عالمية في صناعات كتير جدا ومع موقع مصر الجغرافي والبنية الأساسية اللي اتعملت منتجات مصر هتغزو الأسواق العالمية وفي الشرق الأوسط وأفريقيا..

من بين الصناعات المهمة اللي مصر نجحت أنها توطنها هي صناعة الأجهزة المنزلية الحديثة وبكل منتجاتها ودا سوق عالمي مهم جدا وفيها استثمارات ملهاش أول من اخر ومع انتهاء مصر من مشروعات البنية الأساسية في المواني والطرق واللوجستيات والمناطق الصناعية اتحولت لمركز عالمي لجذب الشركات الدولية في صناعة الأجهزة المنزلية لأن مصر بقت مكان مثالي للتصنيع بالنسبة للشركات العالمية لأسباب كتير أولها زي ما قلنا البنية التحتية القوية وتاني سبب قربها من كل الأسواق ودا هيوفر للمصانع دي فلوس كتير كانت تدفعها في النقل والشحن للووصول للأسواق البعيدة.

ولو متابع اقتصاد هتلاقي إن فيه شركات عالمية كبرى أعلنت في الفترة الأخيرة عن خطط توسعية ضخمة تشمل إنشاء مصانع جديدة وتوسيع المصانع الحالية ومستفيدة من البنية التحتية الصناعية القوية والحوافز الاستثمارية واتفاقيات التجارة الحرة اللي بتسهل النفاذ إلى أسواق أفريقيا والشرق الأوسط وأوروبا..  وعلى سبيل المثال أعلنت شركة سامسونج للإلكترونيات أن استثماراتها في مصنعها بمدينة بني سويف تجاوزت 700 مليون دولار ودا خلاها واحدة من أكبر المستثمرين في قطاع الإلكترونيات بمصر  وضخت الشركة 85 مليون دولار إضافية لتوسيع خطوط إنتاجها خاصة في تصنيع أجهزة الموبايل والتابلت إلى جانب استمرار إنتاج شاشات التلفزيون المتطورة وبيعتبر مصنع سامسونج في بني سويف مركز إقليمي للانتاج والأول من نوعه في الشرق الأوسط وأفريقيا وواحدًا من بين 14 مصنع عالمي للشركة وتبلغ الطاقة الإنتاجية للمصنع 6 ملايين وحدة سنويا.

وبخلاف سامسونج فيه شركات عملاقة دولية في صناعة الأجهزة المنزلية والكهربائية جت السوق المصري زي شركات هاير وبيكو وهايسنس وشارب وكلها أعلنت عن خطط استثمارية جديدة في مصر بهدف زيادة الإنتاج المحلي توطين التكنولوجيا ورفع نسبة التصدير وتعزيز قدرة مصر على التحول إلى قاعدة تصنيع إقليمية لصناعة الأجهزة المنزلية.

وعلى سبيل المثال أعلنت شركة هايسنس الصينية عن خططها لإنشاء مصنع جديد  في العين السخنة، ليكون مركز إقليمي لإنتاج الأجهزة المنزلية والتلفزيونات في مصر ولتعزيز وجودها في الشرق الأوسط وأفريقيا والاستفادة من الموقع الاستراتيجي لمصر كبوابة للأسواق العالمية… وكمان شركة بيكو افتتحت  المرحلة الأولى من مجمعها الصناعي الأول في مصر بمدينة العاشر من رمضان باستثمارات 110 ملايين دولار. . كمان  شركة هاير الصينية بتستعد لتعزيز استثماراتها في السوق المصري من خلال ضخ 500 مليون دولار إضافية خلال ال5 سنين الجايين لتوسيع مجمعها الصناعي في مصر… كمان  شركة LG إلكترونيكس مصر كشفت عن خططها لتوسيع مصنعها في العاشر من رمضان واطلاق خط إنتاج جديد للتلاجات باستثمارات  150 مليون دولار.

طبعا كل المشروعات دي في قطاع الأجهزة المنزلية والكهربائية هتوفر مليارات الدولارات من الاستيراد وفي نفس الوقت هتحقق صادرات ضخمة جديدة ودا هيكون إضافة قوية للاقتصاد المصري وسوق الصرف.