الدهب طار فوق السحاب والاسعار طلعت لمستويات قياسية.. ياترى مصر بنتج كام طن دهب في السنة والاحتياطي من المعدن الأصفر وصل كام.
وكلنا طبعا متابعين أسعار الدهب اليومين دول وازاي الأسعار قفزت بشكل غير مسبوق ووصل جرام الدهب عيار 24 لحواي 5 آلاف جنيه بالمصنعية وعالميا للأونصة تخطت ال3 آلاف دولار والاصعب إن الدهب لسه هيزيد بسبب الأحداث اللي في العالم والمنطقة ورسوم ترامب الجمركية واقتراب الفدرالي الأمريكي من خفض الفائدة.. وهنا بتضاعف قيمة الدهب كملاذ آمن للدول وللبنوك المركزية.. والدهب مكون أساسي من مكونات الاحتياطي النقدي للدول وعشان كده اللي يملكه يبقي بيملك عامل أمان مالي كبير وبيكون في الامان من التقلبات الاقتصادية..
طيب مصر عندها دهب قد إيه وبتنتج كام؟
مصر اقدم دولة عرفت قيمة الدهب واول دولة في التاريخ عرفت تستخرجه وتنقيه وتشكله وتحوله من خام بين الصخور لتخف فنية وتماثيل وللزينة والهدايا وعرفت تكتشف المناجم واللي لسه موجودة لغاية دلوقتى من أيام الفراعنة.. ومصر عندها مناجم كتير جدا وبينها واحد من أكبر مناجم استخراج الدهب المكشوفة في العالم وهو منجم السكري.
وبالارقام وصل إنتاج مصر من الدهب 16 طن سنويا أغلبه بيجي من منجم السكري بالصحراء الشرقية وفي مصر حوالي 270 موقعاً للدهب منها 120 موقع ومنجم تم استخراج الدهب منها قديما ومن بينها منجم السكري الأكبر والأشهر في مصر.. كمان الدولة طرحت عمليات تنقيب واكتشاف واسعة عن الدهب وباستثمارات هتوصل مليار دولار بحلول 2030.. ومش بس كده .. دا كمان أعلنت عن إنشاء مدينة الدهب على مساحة 150 فدان و كشفت عن بناء أول مصفاة معتمدة للدهب في منطقة مرسى علم ضمن خطة طموحة لتعزيز مساهمة قطاع التعدين والثروة المعدنية في الاقتصاد المصري.
كمان البنك المركزي المصري قدر يخزن احتياطي كبير من الدهب قدرت قيمتها بحوالي 12 مليار دولار بنهاية اكتوبر اللي فات ودا قبل الزيادات الأخيرة والقياسية في أسعار الدهب ودا معناه أن الرقم دا زاد بشكل كبير مع الأسعار العالمية الجديدة.
وحسب بيانات يناير قفزت قيمة إجمالي أرصدة الدهب في البنك المركزي المصري بنسبة 107.7% خلال 2024، بزيادة قيمتها 280.208 مليار جنيه وسجلت 540.4 مليار جنيه بنهاية ديسمبر الماضي.
الحقيقة البنك المركزي المصري اتصرف بذكاء شديد في موضوع احتياطي الدهب دا لأنه في سنة 2022 لو فاكرين اشتري كميات كبيرة من المعدن الأصفر رغم الأزمات اللي كنا فيها وحسب بيانات مجلس الذهب العالمي في سنة 2022 مصر اشترت 47 طنا على مدار سنة 2021، وتم إضافة 44 طن للاحتياطي في شهر واحد وقتها وشراء 64 كيلو تقريبا في مرحلة لاحقة ليسجل احتياطي الذهب في مصر 125.55 طن وقتها وسجلت مصر تالت نمو في احتياطيات الدهب في العالم .
المصدر: بانكير
ملحوظة: مضمون هذا الخبر تم كتابته بواسطة بوابة المصريين في الكويت ولا يعبر عن وجهة نظر مصر اليوم وانما تم نقله بمحتواه كما هو من بوابة المصريين في الكويت ونحن غير مسئولين عن محتوى الخبر والعهدة علي المصدر السابق ذكرة.
