هاجمت الإعلامية المصرية، مروة صبري، زميلتها المذيعة آلاء عبدالعزيز، بعد خروج الأخيرة في مقطع فيديو تعلن إصابتها بفصام الشخصية، وكشفت صبري عن تفاصيل مكالمة قالت إنها دليل على ادعاء آلاء عبدالعزيز ورغبتها في تصدر التريند.

مروة صبري تهاجم آلاء عبدالعزيز

وفي برنامجها، قالت مروة صبري مهاجمة آلاء عبدالعزيز: "النهاردة هحكي لكم عن مصيبة وكارثة وحاجة لا يصدقها عقل الحقيقة، من يومين ثلاثة طلع علينا ظاهرة جديدة، واحدة كانت بتشتغل مذيعة اسمها آلاء عبد العزيز، أنا من ناحيتي حاولت التواصل معها وكلمنا أحد الدكاترة النفسيين يطلع معانا على الهوا وهي موجودة علشان يساعدها على العلاج".

 وعن تفاصيل المكالمة قالت مروة صبري: "أول سؤال سألته لما اتصلنا بيها، هو إنتو بتدفعوا فلوس. وقبل الهوا بساعة أو ساعتين قالت معلش مش هطلع في البرنامج إلا لو دفعتي عشرة آلاف جنيه".

وأضافت متحدثة عن تفاصيل مرض آلاء عبدالعزيز: "كل الدكاترة النفسيين بيقولوا إن اللي عنده فصام الشخصية لا يعلم إنه مريض بالفصام.  طيب دلوقتي أنا عايزة أساعدك وإنت بتساوميني على فلوس؟ ده يبين إنك إنت مش مريضة، واعترفتي بنفسك وقلت أنا بعمل تريند، ونجحت فيه واشتهرت، وأكدت على إنك مش هتظهري في اي برنامج إلا لو أخدت فلوس، نعم نجحتي تعملي تريند، برافو، بس تريند رخيص وفاشل وأهبل". 

 شقيقة آلاء عبدالعزيز ترد

 في المقابل ردت شقيقة آلاء عبدالعزيز في أحد البرامج التليفزيونية المصرية على الهجوم الذي تتعرض له شقيقتها بعد إعلان أنها مصابة بفصام في الشخصية قائلة: يا جماعة آلاء مذيعة معروفة مش محتاجة تمثل أو تعمل تريند، لكن هي فعلا في كارثة كبيرة جدا ولازم تتعالج، مضيفة في واحدة قريبتنا بتكرهنا عملت لها سحر أسود والسحر ده بيتجدد وجوزها أصلا مكمل عليها".

وقالت شقيقة آلاء عبدالعزيز إن الإعلامية المصرية ضحية لعائلتي الأب والأم وزيجتين فاشلتين، لافتة إلى أن شقيقتها كانت تتعرض للضرب من زوجها الأول، والزوج الآخر هرب لمدة عامين، ثم أخبرها بأنه طلقها ولم يسأل عن ابنته لو لمرة، بحسب تصريحاتها.

وطالبت شقيقة آلاء عبدالعزيز الجمهور بدعم المذيعة المصرية وعدم الافتراء عليها بأن ما تفعله ما هو إلا للتريند فقط، مؤكدة على أن شقيقتها في كارثة حقيقية.

مرض آلاء عبدالعزيز

وخلال الأيام الماضية، ظهرت المذيعة المصرية آلاء عبدالعزيز منهارة في مقطع فيديو تعلن إصابتها بفصام الشخصية، لتبدو وكأنها تتحول إلى شخص آخر في نفس الفيديو وسط تأكيد الأطباء بأن مريض الفصام لا يعلم أنه مريض وأنه من المحتمل أن يكون هناك شيء آخر غير الفصام.

 وقالت آلاء عبدالعزيز في مقطع الفيديو الذي صدمت فيه الجمهور: "أنا آلاء عبد العزيز المذيعة الداعية الإسلامية أنا نمت صحيت لقيت نفسي خلعت الحجاب وبنزل بليل وبقيت واحدة تانية".

وفي منشور لها عبر حسابها الشخصي على تطبيق تبادل الصور إنستجرام قالت: "جماعة أنا محتاجة اعترف لكم اعتراف أنا مريضة بجد انا مريضة حاليا عندي حالة انفصام شخصية وانتكاسة نوبة هوس دي مش انا دلوقتي انا آلاء عبد العزيز إلى بتكلمكم التانية دي م انا انا مش فاهمه حاجه ولازم اتعالجي انا بتدمر الشخصية دي بتدمرني".

الجمهور يرد

 من ناحية أخرى تفاعل الجمهور مع مرض آلاء عبدالعزيز في تعليقات بينها ما دعمها وأخرى اتهمتها بالكذب ومن بين التعليقات: " أنا بس نفسي تحترموا عقولنا وأنتوا بتعملوا أي حاجة تطلعكم نريند، أنا طبيبة وبقولك أنت كذابة مريض الفصام مش بيبقة عارف إنه عنده فصام وأنت طالعة بتشخصي نفسك على الهوا تبقي كذابة".

وفي المقابل دافع آخرون عنها مهاجمين مروة صبري وكتبوا في تعليقاتهم: "الحقيقة إن أنت يا مروة أغرب مذيعة أنا بشوفها، اعتمادك كله على النيل من الآخرين وتشويههم، ما بتتقيش ربنا في حاجة وحقيقي أنا خايفة عليكي، طول الوقت بتستبيحي أي حد لمجرد التريند، ودلوقتي طالعة بتهاجميها، ما يمكن فعلا مريضة! اتق الله".